پی ٹی آئی کے حمایت یافتہ خرم ذیشان خیبرپختونخوا سینٹ ضمنی انتخابات میں کامیاب، 91 ووٹ حاصل

پی ٹی آئی کے حمایت یافتہ خرم ذیشان خیبرپختونخوا سینٹ ضمنی انتخابات میں کامیاب ،سینیٹر منتخب 137 ووٹوں میں سے 91 ووٹ حاصل کیے۔

پشاور (رئیس الاخبار) — پاکستان تحریک انصاف (پی ٹی آئی) کے حمایت یافتہ خرم ذیشان خیبرپختونخوا سے جنرل نشست پر سینیٹر منتخب ہوگئے۔

تفصیلات کے مطابق مجموعی طور پر خرم ذیشان خیبرپختونخوا سینٹ ضمنی انتخابات میں 137 ووٹوں میں سے 91 ووٹ حاصل کرکے واضح برتری کے ساتھ کامیابی حاصل کی۔ حزبِ اختلاف کے حمایت یافتہ امیدوار تاج محمد آفریدی کو 45 ووٹ ملے، جب کہ ایک ووٹ مسترد ہوا اور 8 ارکانِ اسمبلی نے ووٹ کاسٹ نہیں کیا۔

سینیٹ کی یہ نشست تحریکِ انصاف کے رہنما اور سینیٹ میں اپوزیشن لیڈر شبلی فراز کی نااہلی کے باعث خالی ہوئی تھی۔ شبلی فراز کو 9 مئی 2023 کے واقعات سے متعلق مقدمات میں سزا سنائے جانے کے بعد نااہل قرار دیا گیا تھا۔

خیبرپختونخوا اسمبلی میں ہونے والے ضمنی انتخاب میں جنرل نشست کے لیے تین امیدوار مدمقابل تھے۔ پولنگ صبح 9 بج کر 30 منٹ پر شروع ہوئی اور شام 4 بجے تک جاری رہی۔ صوبائی الیکشن کمشنر سعید گل نے پولنگ کے لیے ریٹرننگ افسر کے فرائض انجام دیے۔

انتخابی عمل کے دوران پی ٹی آئی کے امیدوار عرفان سلیم نے خرم ذیشان (khurram zeeshan pti)کے کورنگ امیدوار کے طور پر حصہ لیا، جبکہ آزاد امیدوار عابد خان یوسفزئی اور پیپلز پارٹی کے امیدوار نثار خان انتخاب سے دستبردار ہوگئے۔

وزیر اعلیٰ خیبرپختونخوا سہیل آفریدی نے بھی اسمبلی پہنچ کر اپنا ووٹ کاسٹ کیا اور میڈیا سے گفتگو میں کہا کہ

“ان شاء اللہ چیئرمین عمران خان کے نامزد امیدوار خرم ذیشان خیبرپختونخوا سینٹ ضمنی انتخابات میں بھاری اکثریت سے کامیاب ہوں گے۔”

واضح رہے کہ اس نشست پر کامیابی کے لیے کم از کم 75 ووٹ درکار تھے۔

گزشتہ روز سپریم کورٹ کے ایک آئینی بینچ نے شبلی فراز کے وکیل کی جانب سے ضمنی انتخاب رکوانے کی درخواست مسترد کردی تھی۔ شبلی فراز نے اپنی نااہلی اور بطور سینیٹر ڈی نوٹی فکیشن کو پشاور ہائی کورٹ میں چیلنج کیا تھا، تاہم عدالت نے رواں ماہ کے آغاز میں انہیں کوئی ریلیف دینے سے انکار کرتے ہوئے الیکشن کمیشن کو خالی نشست پُر کرنے کی اجازت دی تھی۔

Congratulations cheetah @khurramzeeshan pic.twitter.com/4EKURdmv3J
— Sohail Afridi (@SohailAfridiISF) October 30, 2025