بگ باس 19 کا فاتح گورَو کھنّا ٹرافی، 50 لاکھ روپے اور نئی کار کے ساتھ جیت

بگ باس 19 کا شاندار فائنل: گورَو کھنّا چیمپئن قرار

بگ باس 19 کا فاتح گورَو کھنّا بن گئے۔ 15 ہفتوں پر مشتمل سخت اور دلچسپ مقابلے کے بعد اتوار کی شب فائنل میں سلمان خان نے ان کا نام بطور چیمپئن لیا تو اسٹیج پر خوب دھوم مچ گئی۔ گورَو کھنّا کو ٹرافی کے ساتھ 50 لاکھ روپے کی انعامی رقم اور ایک نئی کار بھی دی گئی۔

اس سیزن کے پانچ حتمی امیدواروں میں گورَو کھنّا، فرحانہ بھٹ، پرنیت مورے، تانیا مِتّل اور امال ملک شامل تھے۔ فائنل میں سخت مقابلے کے بعد فرحانہ بھٹ رنر اپ قرار پائیں۔

گورَو کھنّا نے پورے سیزن کے دوران اپنی بردباری، تحمل اور باوقار شخصیت سے ناظرین سمیت میزبان سلمان خان کو بھی متاثر کیا۔ سلمان خان متعدد بار ان کے کھیل اور رویے کی تعریف کرتے رہے، جس نے انہیں فین فیورٹ بنا دیا۔

یہ امر بھی اہم ہے کہ گورَو کھنّا اس سے قبل 2025 کے ’سیلیبریٹی ماسٹر شیف‘ ٹائٹل کے بھی فاتح رہ چکے ہیں اور 20 لاکھ روپے انعام جیت چکے ہیں۔ ان کی شاندار اداکاری اور پرفارمنس خاص طور پر ڈرامہ سیریل ’’انوپما‘‘ میں بھی بہت مقبول ہوئی۔

بگ باس 19 کی کامیابی کے بعد توقع ہے کہ گورَو کھنّا کی شہرت میں مزید اضافہ ہوگا اور وہ بھارت کی ٹیلی ویژن انڈسٹری میں اپنا مقام مزید مضبوط کریں گے۔